قصص المتفوقين

شيماء نوش 

المجموع 2384

كل طالب/ة بكالوربا بحلم باليوم الي رح يتفوق فيه

 ويجمع المجموع الي برضيه ويفرح قلبو وقلب عيلتو

بس في طالب بشتغل ليوصل وفي طالب بضل عم يحلم 

انا كنت من النوع الي بشتغل ليوصل ما كنت اقعد اتخيل

 حالي متفوقة ولا كنت بحلم اني اوصل لهي النتيجة 

بس كان شغلي كافي ليوصلني لهون ورغم كل الظروف الي مرت معي

 وكل العقبات ما قدر شي يوقف بطريقي كنت اوقع بس ارجع وقف من جديد ..

طبعا ببداية السنة كنت متحمسة وعم ادرس منيح

 بعدا بلشنا نقدم مذاكرات وصار في ضغط مذاكرات والكميات المنيحة 

الي عم ناخدها ما كان عندي عدد ساعات محددة ادرس 

فيا كل يوم كنت ادرس للمذاكرة بالدرجة الاولى 

وبالوقت الي بزيد باخد فكرة عن الي اخدناه بباقي المواد 

ما كنت لحق بسبب عدد ساعات الدوام الطويلة بس كنت 

بوقت العطلة خلص التقصير الي علي و الي فادني كتير

 كنت امشي مع مذاكرات المدرسة وهالشي كتير مهم هي المذاكرات قوتني 

في فترات كتيرة كنت اتعب وابكي وما أدرس واحيانا

 ما قدم مذاكرات  وهالشي طبيعي بس كنت ارجع قوي حالي و

اصبر مشان حقق حلمي واوصل للشي الي بدي ياه .

بيتي بحلب الجديدة والكل بيعرف شو صار بآخر فترة 

بحلب بالوقت الي بلش فيه الجد وكان ما ضلان للفحص ا

اقل من خمس شهور اكيد مو سهل انك تدرس تحت ضغط 

كتير كبير  وخوف اكبر خوف على مستقبلك وعلى اهلك والعالم الي بتحبن 

ومو سهل انك تدرس ببيت مو بيتك وانك تغيب عن المدرسة

 لفترة منيحة بسبب القذائف وبسبب منطقة المدرسة بذاتا ..

بس بظل هالخوف الي عشتو قدرت اتغلب عليه بكتير اوقات

 وادرس  واوقات تغلب عليي وكسرني 

بس الارادة كانت اقوى من كلشي عشتو ارادتي بأني 

كون راضيه عن دراستي وعن نتيجتي واني ما قصر ابدا

بوقت الحجر الصحي كتير تعبت وكتير مليت وكنت حس حالي 

ما رح اقدر جمع او اوصل ليلي بدي ياه كانت فترة كتير صعبة علينا كلنا اكيد

 سهل انك تضل بالبيت كل الوقت وبنفس الوقت عندك بكالوريا 

ولازم تدرس وانت بعيد عن جو الدراسة والمدرسة والاساتذة 

وانو مو عرفان شو مصيرك رح تقدم فحص ؟ كيف رح يخلص المنهاج ؟ شو ندرس؟ 

والف سؤال كنت كل يوم اسألو 

بعدين صرت فكر كيف استغل هالعطلة 

وكيف بدي نظم وقتي واوصل لحلمي والحمدلله

 انو كنا خالصين المنهاج وباقي ثغرات صغيرة

برغم صعوبة هالفترة بس كانت اهم فترة كنت اتعب يوم اليوم

 الي بعدو كنت ادرس وعوض الي راح .

 دراستي كان اساسا التركيز بفترة ال 3 شهور 

الطلاب درسو المنهاج تلت مرات تقريبا انا ما كملت المرتين 

بس كنت ركز كتير منيح وكنت ما اترك فقرة مترددة بدراستا

 اكيد كل واحد عندو مشكلة بمادة او تنتين او اكتر 

بس ما لازم نستسلم كنت اشتغل على كل مادة 

وهدفي كان اسكر هالمادة كنت اعطي لكل مادة وقتا وحقا 

 والاساتذة كتير ساعدونا و المدرسة ما نستنا وقفت معنا

 وصارت تبعتلنا المذاكرات اون لاين وسلالم التصحيح وكيف نظم وقتنا  

بتشكر المدرسة والاساتذة الي تعبو معنا كتير ولولاهن ما كنا وصلنا لهون 

بوقت الفحص ما كنت خايفة ابدا الحمدلله وهالشي كتير مهم

وما كنت روح الا وانا مخلصة كلشي وهالشي بحسسك بالراحة وانت عم تقدم 

كنت قدم المادة ولما اطلع انساها حتى ما كنت طلع عالحل

 لحتى اهتم بالمادة الي بعدا واعطيا حقا 

والداعم الاكبر اكيد هو اهلي كانو معي دايما وساعدوني لاوصل لهي النتيجة  ⁩

واشخاص غاليين علي كتير تحملوني ووقفو معي ودعموني وكانو سبب نجاحي 

كنت احلم كون متفوقة والحمدلله كانت نتيجتي فخر كبير لالي وفرحة ما بتنوصف 

فرحتك وفرحة اهلك والناس الي بحبوك ورضاك عن نتيجتك

 بستحقو كل هالتعب الي رح تنساه باللحظة الي رح توصل فيا لحلمك 💪🏻