قصص المتفوقين

لاسم : جود كريمش  

المجموع: 239.2/240

رح احكي عن تجربتي مع البكالوريا واللي فينا نعتبرها أهم مرحلة بحياتنا كونها بتحدد مستقبلنا و بتحدد الكلية اللي رح نكمل فيها دراستنا ...

طبعاً أنا بلشت تحضير للبكالوريا قبل بسنة بس...

دخلت على هل سنة مندفعة و كتير متحمسة للدراسة و  مقررة أدرس كل درس بدرسه وما أحاول أراكم أي شي علي ... طبعا هل شي بدرجة ما هو سهل نحكيه لكن هو صعب نطبقه.. هل كلام بدو عزيمة كبيرة بدون ملل .. واللي حاطط هدفه قدامه وعم يشتغل عليه مستحيل يمل ..

 بلشت السنة وصرت أشتغل وأدرس تقريباً كل درس بدرسه  وأكيد كمية الدروس أول السنة بتكون أقل بكثير من منتصف السنة ... بس مع ذلك كنت حاول قدر المستطاع ما أراكم الدروس  ..  كنت أحيانا ما أحسن أدرس بنفس اليوم كل شي أخذته  ممكن لانو كان علي ضغط مذاكرات ..بس كنت  حدد أيام بالاسبوع لأخلص من التراكم ... ونصيحتي لكم لا تركموا الدروس عليكم و تتركوهم لوقت المذاكرة لانو دراستهم بدها تصعب عليكن كتيير و رح تنسوا شرح الاستاذ وممكن يصير عندكن ثغرات ببعض الأماكن وتوقعوا فيها وقت الفحص ... 

طبعاً العامل الأساسي اللي ساعدني هو المذاكرات الدائمة اللي كان يعملها المعهد و التزامي فيها .. لأنو المذاكرة هي اللي بتحدد مدى فهمك للدروس و بتقيّم دراستك و بتحذرك من الثغرات اللي ممكن ما كنت منتبه الها ..

وبرجع بكرر الانسان الملتزم و الطموح مستحيل يتراجع عن هدفه أو يمل ويقول أنا مالي قد المسؤولية ..

وهيك مرت الأيام و وشهر ورا شهر لحد ما وصلنا للشهر التالت .. كان المفروض بهل شهر نبلش مذاكرات نصفية و شاملة لكن للأسف تسكر كلشي ومن ضمنهم المعاهد بسبب فيروس كورونا .. الحمد لله كنا خالصين المنهاج كله تقريباً وهاد السبب اللي خلانا نتطمن أكثر ..بس كانت صعبة علينا كتيير فكرة انو نقعد بالبيت كل هل فترة الطويلة و ندرس لحالنا ... بس المعهد ما تركنا أبداً و ضل يدعمنا من خلال النت و يبعتلنا المذاكرات و السلالم و كتير تعبوا معنا... 

 مضت الايام و تحدد موعد الفحص و نحذف قسم من المنهاج و وصلنا ليوم الفحص ...

طبعاً درست كتير وتعبت كتير لهل يوم المنتَظر  .. كنت خايفة شوي بس واثقة من دراستي و بعرف حالي شو مشتغلة خلال السنة و أهم شي انو وكلت أمري لرب العالمين و كنت أدعي كتيير ...

والحمد لله كل لحظة تعبتها و كل ليلة سهرت فيها ما راحوا ع الفاضي ...

الله كرمني و استجاب لدعائي و هيك فرّحت قلب عائلتي و حققت حلمي و دخلت الكلية اللي كنت بتمناها...

نصيحتي الكم انكم تشتغلوا منيح و تدرسوا كتير ..صدقوني سنة و بتمرق بس هل سنة رح تترك تأثير كبير بحياتكن ورح تحددلكن مستقبلكن ..

بتمنالكم كل التوفيق أصدقائي و دمتم بخير❤️